3 jannewaori 0.05 Omdat Cees Nooteboom de P.C. Hooftpries krigt lees ik now dus Rituelen. Een boek uut 1980. En dat mos wennen. Et pakte me de eerste vuuftig bladzieden hielendal niet. Ik vun zien reisboeken die k in de kaaste staon hebbe, De wereld een reiziger en De omweg naar Santiago, indertied een stok mooier om te lezen. Mar soms moej even deurzetten. Ok mit et lezen van een boek. Gaondeweg vun ik et toch mooier wodden. En et is vanzels slimme aorig dat Nooteboom et dienstmaegien Petra konsekwent Braobaans praoten lat. Deurzetten dus, altied deurzetten. Laot dat van t jaor de leidraod mar wezen veur oons allemaole.2 jannewaori 23.55 Ik bin een omnivoor. Ik vien van alles mooi. Joseph Haydn en Frans Bauer. En ik leze mit etzelde grote genoegen een streekroman van Abe Brouwer en de zeuvendielige cyclus Het Bureau van J.J. Voskuil. Ik bin dus een allesvreter en ik wete sund vandaege dat dat niet zo best is.
  In et boek Rituelen van Cees Nooteboom zegt keunsthaandeler Bernard Roozenboom tegen heufdpersoon Inni Wintrop dat de een omnivoor is. En hij zegt dr bij: Je kunt niet kiezen, dat is altijd gebrek aan klasse. Daarom ben je een scharrelaar. Dat is iemand die alles mooi vindt. De meer as treurige konstatering op e twiede dag van t jaor is dus dat ik een scharrelder bin.

1 jannewaori 1.15 Krek weer thuus uut Et Vene. Ik gao now nog mar even een uurtien naor Omroep Frieslaand kieken. Daor is et laeste theaterpergramme van Rients Gratama te zien. En ik bin toch klaor wakker. Ak now al op bedde gao, kriek vermoedelik gien wink in de ogen. O ja, ik weens vanzels alle meensken, die van tied tot tied in dit dagboek ommesnuuien, veul heil en zegen in dit nije jaor!

20.00 Vandemorgen zag ik Harmen en Jacob alweer. Harmen zien mem wodt vandaege 90 jaor! Daor wak dus, zoas gebrukelik op e eerste morgen van t jaor op vesite. Negentig! Ik kan me niet indaenken dak dat haelen zal. Now ja, en veerder snijde et prachtig, kwammen dr nog een peer nijjaorwinders langes en zat de leasepoes zowat de hiele dag, bange van alle vuurwark, votkreupen onder mien bedde. Aenlik mag hij niet boven kommen, mar now netuurlik wel.

Naor de volgende bladziede - Naor de laeste bladziede 2003