2 jannewaori 17.30 Vleden jaor wodde me vraogd as dit internetdagboek jaorliks niet ok as boek uutgeven wodden kon. Now, dat is niet de bedoeling en het ok nooit de bedoeling west. Mar veur de echte liefhebbers hebben Jan de webmaster en ikke wel een extra service. Wie et dagboek 2004 in chronologische volgodder, dus van 1 jannewaori t/m 31 december, hebben wil Van vandaege of kan ik et jim al toemailen. En wie et dan ok nog uutprinten wil: et is mit mekeer 96 A-vierties. Ien disser daegen liggen diskette en A-vierties trouwens ok al in et archief van de Stellingwarver Schrieversronte.
  Gisteraovend hek een mooie thriller zien op e tillevisie: Misery mit James Caan. Ik hadde him eerder zien, mar et was weer lieke spannend. Een slim bekende schriever verongelokt mit de auto in de snij en wodt vunnen deur een vrouw die him mitnemt naor heur huus en him daor verpleegt. De vrouw bliekt zien grootste fan te wezen. Mar et meens deugt lange niet. Ze is staepelgek en het al verschillende meensken vermoord. Dat ze wil de schriever op et laest ok doodmaeken. Zoen film zet je as slim bekende schriever vanzels wel an et daenken. Dat ik zal alle koppels vrouwluden daor ak van t jaor henne moet toch mar es wat extra in de gaten holen

1 jannewaori 17.20 Krek nao middernaacht bin k op e straote in Et Vene deur een wildvremde vrouw omhelsd en op e wangen tuut. Dat now ja, ik daenke dat dit wel es een wild, aeventuurlik en enerverend jaor wodden kan
  Vandemorgen hek breur Jan en schoonzuster Roelien et nijjaor ofwunnen. Zij weren bij Roelien heur moeder in Wolvege en hebben daor dus et oolde jaor uutzeten. En vandemiddag hek mien jaorlikse puttien wark daon: de ammerillen (hoe schrief ik dat?) verpot. Ik hebbe dr achte. Ie hebben volk dat zoen bolle votgooit as hij uutbluuid is. Schaande! Ik kriege ze ieder jaor weer in de bluui. As ze bluuid hebben, lao k ze gewoon in huus staon en blieve ze waeter geven. Mar op 1 oktober kommen ze in et pikkedonker te staon. Dan starft et blad of en kriegen ze mar een inkelde keer een klein betien waeter. Nao een vorrels jaor, op 1 jannewaori dus, hael ik ze weer veur t locht, geve ze nije grond en gao ze elke dag waeter geven. En dan gebeurt et jaorlikse wonder: nao een peer weken kommen de eerste knoppen!

Naor de volgende bladziede - Naor de laeste bladziede 2004