19 november 17.00 Sund gister voer ik de voegelties weer op drie plakken om huus henne mit vetbollen, aepeneuten, zunnebloemepitten en aepeneutekeze. Wat hek al een vlocht op e kooi! Ze bin dr gek op! Now et koolder wodt moewe die dierties vanzels helpen. Ik bin altied nogal begaon mit meensken en dieren die et drege hebben. De verschoppelingen van disse wereld hebben mien sympathie.
  Vandaege hek et 23ste heufdstok van mien nije roman hielemaole uuttikt en opsleugen in de komputer. Ik hebbe de heufdstokken 22 en 23 vervolgens naor Jelle maild. Dan kan die et spul drekt lezen. En now zak naor Fokje toe om een bod waarm eten. Heerlik dak vandaege niet zels hoefde te koken. Now kon k an iene kliere deurwarken.
  Hieronder een foto die k vandemiddag in huus maekt hebbe. Zo mooi hek ien van mien lidkaktussen in de bluui. Ik hebbe nog iene die vol knoppen zit, mar die bluuit nog niet.


18 november 17.00 Ik bin now drie daegen aachter mekeer liekem allienig thuus. Dat is dus de kaans om flink an mien nije roman te warken. Ik wor deur gien meens lastigvalen. Ik hebbe de hiele tekst van heufdstok 22 in klad klaor en hebbe besleuten om dr twie heufdstokken van te maeken, aanders zol nommer 22 wel hiel arg groot wodden. Dat is niet zo mooi. Et is mooier ak et in twie stokken knippe. Ik hebbe alle tekst nog es bewarkt, verbeterd, stokkies schrapt en tekst bijvoegd. En doe hek een lieste mit wel duzend mooie oolde Stellingwarver woorden en uutdrokkings deurlezen en uutzocht wak in dit stok tekst an moois kwiet kan. Bij ieder heufdstok kiek ik die lieste, die k deur de jaoren henne anlegd hebbe, deur. Ik bin et an mezels en an mien tael verplicht dak die zo goed, geve en mooi as mar kan schrieve. Ik hebbe vandaege et stok wat heufdstok 22 wodden gaot ok hielemaole uuttikt en in de komputer opsleugen. Morgen zak et stok uuttikken dat dan heufdstok 23 wodden gaot.

Naor de veurige bladziede