12 juni 17.00 Et is hier prachtig! Doe we vandemorgen om kwat veur achte van bedde kwammen, hawwe een fezaantehaene, twie ringeldoeven, een zwatte liester , een ekster en een moederknien mit twie jonkies om de deure. Now, dat is toch mooi! Dat vunnen we vule mooier as die Trump en Kim op e tillevisie! Ik hadde trouwens in jaoren gien fezaant zien. Et hiet hier trouwens Bavelds Dennen. We zitten kot bij de greens mit Duutslaand.
  We bin vandemorgen naor de VVV in Diepenheim reden, an de aandere kaant van Twente, en daor hewwe een routekaorte veur de Zes-kesteletocht op e fiets kocht. Vervolgens hewwe twie elektrische fietsen huurd bij Bouwmeester en doe biwwe bij die zes kestelen langespeddeld. Aachterienvolgens: Nijenhuis, Weldam, Wegdam, Warmelo, Westerflier en Huis Diepenheim. Verschillende kestelen won nog bewoond deur aodellike femilies. Bij kesteel Weldam hewwe de prachtige tuun bekeken en in de oranjerie van Warmelo hewwe wat eten had. Ik hadde die tocht jaoren leden ok al es mit Fettje daon. Zo mooi!
  We bin now weer even in oons huus en gaon zo weer vot. Om half zeuven zuwwe bij kammeraod G in Borne wezen en dan gaon we mit n drienend eten in resteraant De Molen in Fleringen. Dat wodt ongetwiefeld een gezellige aovend!
  Hieronder twie fotos van een mooie dag. Links: kesteel Nijenhuis. Rechts: kesteel Weldam.


Naor de volgende bladziede - Naor de veurige bladziede