10 juli 17.20 Et is vandaege percies 55 jaor leden dak slaegde veur mien ulo-examen. Mien hemel nog an toe... Ik kan die dag zo weer naor veuren haelen en ik zie juffer Zielstra an et aende van de dag nog bij de deure van de Schouwburg van Et Vene staon. Die schreef alle ciefers op die op e vakken die zij gaf deur de leerlingen haeld wodden. Ze kon veur mij twie achten opschrieven. Iene veur Fraans en iene veur Duuts.
  Ik bin vandemiddag op stap west veur de JVS. In Langedieke hek praot mit et bestuur van de Iemkersverieninge Oost-Stellingwarf. Doe k weer thuus was hek nog even op e fiets naor Wolvege west. In een winkel zee een man tegen me dat zien vrouw wegraekt was en dat et zo wennen mos. Mar ik zol et wel weten en in de kraante lezen hebben. Ik hebbe vraogd hoelange as et now leden was. Een half jaor... Ik hadde gien idee wie die man was. Dat is zo vervelend en et gebeurt zo vaeke. Zoen protte meensken kennen mij en die daenken dan dat ik heur allemaole ok kenne. Mar zo is et gewoon niet. Een mooie, blonde vrouw reup enthousiast van goeie naor me, ik hebbe lieke enthousiast van goeie weerommereupen. Wie is dat toch ok al weer? docht ik. Mar even laeter wus ik dat gelokkig wel, want ja, zovule mooie, blonde vrouwluden ken ik now ok weer niet.
  Et is van t jaor percies 45 jaor leden dat Haarm en ik in augustus op vekaansie weren in Joechoslavi. Dat laand beston doe nog. De fotos hieronder bin neumen op oonze kaemer in hotel International in Budva. Vandaege-de-dag hiet et laand daor Montenegro.


Naor de volgende bladziede - Naor de veurige bladziede