14 meert 17.00 Vandemorgen hek naor kapster Bertha in Et Vene west en die het me et haor wusken, bekubbed en dr kleurversteviger indrokt. Ien keer onder de does en et kleurtien is weer vot, mar ik lieke now veur even vanzels wel jaoren jonger. Nao et knippen hek bij Bertha een koppien ossestatsop en twie plakken bolle mit geitekeze had. Vandemiddag bin k al weer naor Et Vene west veur een ofspraokien mit een vrouw in De Koningshof. Hoe en wat gaot jim veerder niks an. Mar toch... Et is krek as doe k mit an et tillevisiepergramme First Dates. In tussentied hek ok een kollum over de kommende Keuningsdag in Amersfoort naor de kraante stuurd.

13 meert 17.00 Dr hong hier een mooie bonte specht an de poede mit aepeneuten. Ik bin doodstille veur et keukenraem staon bleven om him goed bekieken te kunnen. Want ja, iene kleine beweging en hij vligt vot. Ze zien alles. Hij pikte gruusaordig op e aepeneuten omme. Zolange as Woody Woodpecker doende was, bleven de kleine voegelties vot. Dat akkedeert onder mekeer bliekber niet.
  Vanaovend komt Rino, de tuunman, hier mit de offerte veur van t jaor. Behalven dat zien bedrief de tuun weer beredden gaot, zak ze ok een stokkien van de oprit opnij bestraoten laoten. Veur de gerage zakt et in, dat moet dus wat verhulpen wodden.
  Gister kwam dr een kaorte van Douwe en Romkje uut Sjusjen in Noorwegen. Douwe schrift dat daor folop snie en froast is. En hij lest daor Haarm zien nije boek As ik kiezen moch...


Naor de volgende bladziede - Naor de veurige bladziede