19 september – 17.00 – Vandemorgen he’k Anne Westerhof plus een man die hulp mit et foto’s maeken op vesite had. Anne het me interviewd veur de Stellingwarf. Ik bin dus ok op petret kommen. Dat kon now nog, want over een peer daegen zit ik mal in ’t verbaand en bin ’k niet toonber. Vandaor dawwe dit interview vandemorgen drekt nao de vekaansiedaegen mar daon hebben.
  En dan nog over gister… Naodawwe Groet uutreden binnen, biwwe naor et mooie stattien Medemblik gaon. Daor hewwe wat drinken mit appelgebak had op et terras van Het Wapen van Medemblik. Ik hebbe daor bi’j de waarme bakker een bolle kocht zoda’k me ankem weke redden kan en in de boekhaandel he’k et boek De Stormroos van Corina Bomann kocht. Vervolgens hewwe et bakkeri’jemuseum De oude bakkerij bekeken. Ik was d’r al es eerder west. Jelle hadde et nog nooit zien. Et is een prachtig museum waor bakkers nog echt an ’t bakken binnen. In et museumwinkeltien hewwe vanzels lekker spul kocht. We hebben luncht in resteraant De zingende wielen in Den Oever en doe biwwe de Ofsluutdiek weer overgaon en naor Harlingen reden. Daor hewwe de auto daelezet op et parkeerterrein bi’j de Stienen Man oftewel de Spaanse stadhoolder Caspar di Robles. Een vi’jaand uut de Tachtigjaorige Oorlog! Mar die man het hier vroeger toch goeie dingen daon, dat dat staandbeeld moet mar mooi staon blieven. In Harlingen hewwe de tentoonstelling Koele Wateren in et Hannemahuus bekeken. Ik hadde et een schoffien leden al es bekeken. Veur Jelle was et ni’j. Een schitterende kollektie uut et Rieksmuseum: Hendrik Willem Mesdag, Willem van der Velde, Jacob Maris, Isaac Israëls, Simon van Ruysdael… Zo mooi om et nog es te bekieken! We hebben waarm eten had in et resteraant van rederi’je Doeksen. We zaggen boten vol volk ankommen en boten vol volk weer votgaon. Ze hadden mondkappies op, mar hoe mossen die enorme koppels volk de aanderhalver meter in acht nemen? Dat lokte van gien kaant. Bi’j Jelle en Gerda he’k nog wat dronken en doe bin ‘k naor huus gaon. Daor kwam de poes van de buren drekt bi’j me. Jammer dat die mooie daegen now veurbi’j binnen. Hieronder vier foto’s. Mit de klokke mit: 1. Et oolde stesjon van Medemblik. 2. Et oolde stadhuus van Medemblik. 3.De kop van de Stienen Man, Caspar di Robles op ’e diek in Harlingen. 4. De Westerhaven in Harlingen.


Naor de volgende bladziede - Naor de veurige bladziede